२०२४-२५ च्या हंगामात कर्नाटक-महाराष्ट्र सीमेवरील साखर कारखान्यांना शेतकऱ्यांनी पुरवलेल्या प्रति टन उसाला ५०० रुपयांचा दुसरा हप्ता तात्काळ द्यावा, अशी मागणी जय किसान शेतकरी संघटनेचे अध्यक्ष रमेश पाटील आणि इतर शेतकऱ्यांनी केली आहे. निपाणी तालुक्यातील भोज गावात आयोजित शेतकरी सभेत ही मागणी करण्यात आली. सीमाभागातील साखर कारखान्यांनी उसाला प्रति टन ३५०० ते ४००० रुपये दर देणे अपेक्षित होते. मात्र, त्यांनी केवळ ३००० ते ३१०० रुपये प्रति टन दर देऊन शेतकऱ्यांची निराशा केली आहे.

महाराष्ट्रातील दालदिया आणि बिद्री साखर कारखान्यांनी दुसऱ्या हप्त्याची रक्कम दिली आहे. त्याच धर्तीवर, सीमाभागातील इतर साखर कारखान्यांनीही दुसरा हप्ता म्हणून ५०० रुपये प्रति टन द्यावेत. अन्यथा, रस्त्यावर उतरून तीव्र आंदोलन छेडण्याचा इशारा शेतकऱ्यांनी दिला आहे.

याप्रसंगी शेतकरी संघटनेचे अध्यक्ष रमेश पाटील यांनी आपली भूमिका स्पष्ट केली. शीतल बागे यांनीही विचार मांडले. यावेळी उपाध्यक्ष धन्यकुमार चौगुले, शिवगौडा पाटील, जितेंद्र टाकळे, सुभाष चौगुले, बापू हंपन्नवर, मनोज कोनाप्पन्नवर, संजय आणि बाळगौडा पाटील, संजय माळी, शीतल, अरुण, राजू आणि अनिल पाटील, हनुमंत उप्पर, मल्लप्पा कंचनाळे, राजू मतवाडे, चंद्रकांत नारे, अनिल मडीवाळे यांच्यासह अनेक शेतकरी उपस्थित होते.