हुक्केरी मतदारसंघातील विविध गावांमध्ये सुरू असलेली ‘जल जीवन मिशन’ची कामे तात्काळ पूर्ण करावीत, असे निर्देश हुक्केरीचे आमदार निखिल कत्ती यांनी ग्रामीण पाणीपुरवठा आणि स्वच्छता अभियंता विनायक पुजारी तसेच संबंधित कंत्राटदारांना दिले.

हुक्केरी तालुका पंचायत सभागृहात झालेल्या चौथ्या त्रैमासिक ‘केडीपी’ बैठकीत आमदार निखिल कत्ती यांनी विविध विभागांच्या अधिकाऱ्यांकडून कामाच्या प्रगतीचा आढावा घेतला. यावेळी नेते बसवराज कोळी यांनी, ग्रामीण भागात ‘जल जीवन मिशन’ची कामे संथ गतीने सुरू असून, प्रत्येक घराला शुद्ध पिण्याचे पाणी कधी मिळणार, असा प्रश्न उपस्थित केला. यावर अभियंता विनायक पुजारी यांनी सांगितले की, पहिल्या टप्प्यातील कामे पूर्ण झाली असून दुसरा टप्पा सुरू आहे; परंतु सरकारकडून कंत्राटदारांना अद्याप निधी मिळालेला नाही, त्यामुळे कामांची गती मंदावली आहे. यावर आमदार कत्ती म्हणाले की, “कंत्राटदारांना निधी मिळाला नाही म्हणून कामे थांबवू नयेत. कंत्राटदारांनी त्यांना दिलेली कामे पूर्ण करून ती संबंधित ग्रामविकास अधिकाऱ्यांकडे हस्तांतरित करावीत. त्यांच्या निविदा रकमेबद्दल सरकार स्तरावर चर्चा केली जाईल.”

यावेळी व्यासपीठावर बेळगाव जिल्हा समाज कल्याण विभागाचे सहसंचालक रामनगौडा कन्नोळी, तहसीलदार मंजुळा नाईक, तालुका पंचायत कार्यकारी अधिकारी टी. आर. मल्लाड उपस्थित होते. याप्रसंगी गॅरंटी योजना अध्यक्ष शानूल तहसीलदार, केडीपी नामनिर्देशित सदस्य बसवराज कोळी, गुलाब तहसीलदार, सिद्धराम खोत, कल्लप्पा कत्ती, राजू आवटे, विविध विभागांचे बीईओ प्रभावाती पाटील, कृषी विभागाचे सहायक संचालक रवींद्र रायकर, विद्युत सहकारी संस्थेचे अभियंता नेमिनाथ खेमलापुरे, पोलीस निरीक्षक शिवशंकर औजी आणि इतर मान्यवर उपस्थित होते.