बेळगाव जिल्ह्यातील चिकोडी तालुक्यातून एक धक्कादायक घटना समोर आली आहे. उमरानी गावात एका पिकअप वाहनाने धडक दिल्याने एक महिला गंभीर जखमी झाली असून हा थरारक अपघात सीसीटीव्ही कॅमेऱ्यात कैद झाला आहे.

उमरानी गावातील मुधोळ-निपाणी राज्य महामार्गावर ही घटना घडली. भरधाव वेगात आलेल्या पिकअप वाहनाने सरिता मारुती मगदूम (रा. उमरानी) या महिलेला जोरदार धडक दिली. या धडकेत सरिता गंभीर जखमी झाल्या असून, त्यांना तातडीने चिकोडी येथील खासगी रुग्णालयात दाखल करण्यात आले आहे, जिथे त्यांच्यावर उपचार सुरू आहेत.

या अपघाताचे भयानक दृश्य सीसीटीव्ही फुटेजमध्ये स्पष्ट दिसत आहे. विशेष म्हणजे, याच रस्त्यावरून जात असलेल्या इतर दोन महिला थोडक्यात बचावल्या. त्यांना कोणतीही दुखापत झाली नाही, ज्यामुळे अनेकांनी सुटकेचा निश्वास सोडला.

याप्रकरणी चिकोडी वाहतूक पोलीस ठाण्यात गुन्हा दाखल करण्यात आला असून, पुढील तपास सुरू आहे.