बेळगावच्या स्टँडर्ड ट्रॅक स्पोर्ट्स क्लबचा होतकरू लांब उडीपटू जाफर खान सरोवरण याने आपण राज्यातील सर्वोत्कृष्ट क्रीडापटू असल्याचे सिद्ध केले असून त्याला राज्यपालांच्या हस्ते ‘सर्वोत्तम क्रीडापटू’ पुरस्काराने नुकतेच सन्मानित करण्यात आले आहे.

उडपी येथे झालेल्या दिमाखदार पुरस्कार वितरण सोहळ्यात राज्यपाल थावरचंद गहलोत यांच्या हस्ते जाफर खान सरोवरण याने संपूर्ण कर्नाटकातील ‘सर्वोत्तम क्रीडापटू’ हा पुरस्कार स्वीकारला.बेळगाव शहरातील भरतेश महाविद्यालयातील वाणिज्य शाखेच्या सहाव्या सेमिस्टरचा विद्यार्थी असणारा जाफर खान सरोवरण हा स्टँडर्ड ट्रॅक स्पोर्ट्स क्लबचा सदस्य आहे. त्याने अॅथलेटिक्स विभागातील लांब उडी प्रकारात विशेष प्राविण्य मिळवले असून आजपर्यंत फक्त शहर व जिल्हास्तरीयच नाहीतर राज्य व राष्ट्रीय पातळीवरील स्पर्धा जाफर खान याने जिंकल्या आहेत.जाफरखान सरोवरण याला आई-वडिलांसह भरतेश महाविद्यालयाचे प्राचार्य व प्राध्यापकांचे प्रोत्साहन, तसेच स्टँडर्ड ट्रॅक स्पोर्ट्स क्लबचे प्रशिक्षक प्रदीप जुवेकर आणि त्यांच्या सहकाऱ्यांचे मार्गदर्शन लाभत आहे. उपरोक्त यशाबद्दल क्रीडापटू जाफर खान सरोवरण याचे स्थानिक अॅथलेटिक क्षेत्रासह सर्वत्र अभिनंदन होत आहे.