मंत्री सतीश जारकीहोळी यांच्याविरोधात अपमानजनक शब्दांचा वापर करणाऱ्या व्यक्तीविरुद्ध त्यांच्या समर्थकांनी तीव्र संताप व्यक्त करत बेळगाव न्यायालय परिसर आणि पोलिस ठाण्यासमोर मोठ्या संख्येने समर्थकांनी जमून घोषणाबाजी केली.

मंत्री सतीश जारकीहोळी यांच्याविरोधात सोशल मीडियावर अवमानजनक पोस्ट करणाऱ्या तुमकूर येथील नरसिंहमूर्ती या व्यक्तीला पोलिसांनी अटक केली आहे. या प्रकरणी मंत्री जारकीहोळी यांचे निकटवर्तीय विजय तळवार यांनी बेळगाव मार्केट पोलिस ठाण्यात तक्रार दाखल केली होती. आरोपीला अटक करून बेळगाव येथे आणण्यात आले आहे.

आरोपीविरोधात तीव्र प्रतिक्रिया व्यक्त करत जारकीहोळी समर्थकांनी पोलिस ठाण्याबाहेर आणि न्यायालय परिसरात निदर्शने केली. काँग्रेस कार्यकर्त्या आयेशा सनदी यांनी संताप व्यक्त करताना सांगितले, आरोपीविरुद्ध कडक कारवाई झाली पाहिजे. आम्ही आमचे प्राण गमावले तरी चालेल, पण जारकीहोळी यांचा अपमान करणाऱ्या व्यक्तीला सोडणार नाही. अशा लोकांना योग्य शिक्षा झालीच पाहिजे, अन्यथा आम्ही शांत बसणार नाही, अशी संतप्त प्रतिक्रिया त्यांनी व्यक्त केली.

मंत्री सतीश जारकीहोळी यांच्या समर्थकांचा हा संताप सोशल मीडियावर व्यक्त होणाऱ्या बेजबाबदार वर्तनाविरोधात कडक पावले उचलण्याची मागणी करत आहे. आरोपीविरुद्ध होणारी कारवाई पुढील काळात या प्रकरणाला कोणती दिशा देते हे पाहणे महत्त्वाचे ठरणार आहे.