ऊसाने भरलेल्या ट्रॅक्टरला मालवाहू वाहन धडकल्याने, क्लीनर गंभीर जखमी झाल्याची घटना हलगा नजीकच्या राष्ट्रीय महामार्गावर घडली आहे.

बेळगाव तालुक्यातील हलगा येथील राष्ट्रीय महामार्गावर ऊसाने भरलेल्या ट्रॅक्टरला मालवाहू वाहनाने धडक दिल्याने अपघात झाला. या अपघातात क्लीनर रवीकुमार गंभीर जखमी झाला असून त्याच्या पायाचे हाड मोडले आहे. हि धडक इतकी भीषण होती की मालवाहू वाहनाचा पुढील भाग पूर्णपणे चिरडला गेला.

धारवाडहून बेळगावच्या दिशेने जाणाऱ्या मालवाहू वाहनाने ट्रॅक्टरला जोरदार धडक दिली. या धडकेत वाहनाखाली अडकलेल्या क्लीनरला उपस्थित नागरिकांनी मदत करून बाहेर काढले आणि तातडीने रुग्णालयात दाखल केले. सध्या जखमी क्लीनरवर बेळगाव जिल्हा रुग्णालयात उपचार सुरू आहेत. हा अपघात हिरेबागेवाडी पोलीस ठाण्याच्या हद्दीत घडला असून पोलिसांनी घटनास्थळी पोहोचून परिस्थिती हाताळली.