बेळगाव तालुक्यातील कंग्राळी खुर्द येथील होतकरू युवा पैलवान प्रेम जाधव याने नुकत्याच पार पडलेल्या राज्यस्तरीय म्हैसूर दसरा मुख्यमंत्री चषक कुस्ती स्पर्धेत रौप्य पदक पटकावत बेळगावचा नावलौकिक वाढविला आहे.

दरवर्षीप्रमाणे दसरा सणा निमित्त म्हैसूर येथे राज्यस्तरीय दसरा मुख्यमंत्री चषक कुस्ती स्पर्धा नुकतीच यशस्वीरित्या पार पडली. या स्पर्धेतील 125 किलो वजनी गटात कंग्राळी खुर्द बेळगावचा पैलवान प्रेम जाधव याने मल्ल युद्धांच्या डावपेचांचे उत्कृष्ट प्रदर्शन घडवले. त्याने आपल्या गटातील 5 प्रतिस्पर्धी मल्लांना पराभूत करत अंतिम फेरी गाठली. मात्र स्पर्धेच्या सहाव्या अंतिम फेरीत त्याला दावणगिरीच्या पै. गिरीश याच्याकडून पराभव पत्करावा लागला.

त्यामुळे पै. गिरीश हा सुवर्ण पदकाचा, तर पै. प्रेम जाधव रौप्य पदकाचा मानकरी ठरला. राज्यस्तरीय स्पर्धेत या पद्धतीने बेळगावचा नावलौकिक वाढवणाऱ्या प्रेम जाधव याला आई-वडिलांचे प्रोत्साहन तसेच वस्ताद भाऊ पाटील, एनआयएस प्रशिक्षक काशीराम पाटील आणि प्रशांत पाटील यांचे मार्गदर्शन लाभत आहे. या यशाबद्दल प्रेम जाधव याचे गावांमध्ये तसेच कुस्ती क्षेत्रात अभिनंदन होत आहे.