स्वच्छतेच्या बाबतीत जिल्ह्यात पहिल्या क्रमांकावर असणाऱ्या बैलहोंगल नगरपालिकेच्या नूतन अध्यक्ष-उपाध्यक्षांची निवड बिनविरोध पार पडली.

बैलहोंगल नगरपालिकेच्या नगराध्यक्षपदी विजय बोळन्नावर यांची तर उपाध्यक्षपदी बुड्डेसाब शिरसंगी यांची निवड करण्यात आली. बैलहोंगल नगरपालिकेच्या सभागृहात झालेल्या निवडणुकीत अध्यक्ष व उपाध्यक्ष पदासाठी प्रत्येकी एक नामनिर्देशनपत्र सादर करण्यात आले यामुळे हि निवडणूक बिनविरोध पार पडली आहे. तहसीलदार एच.एन.शिरहट्टी यांनी अधिकृत घोषणा केल्यानंतर चाहत्यांनी नूतन अध्यक्ष आणि उपाध्यक्षांचा सत्कार केला. मिठाई वाटून आणि फटाके फोडून आनंद साजरा केला.

नूतन अध्यक्ष विजया बोळन्नावर बोलताना म्हणाले, आमदार महांतेश कौजलगी यांच्या मार्गदर्शनाखाली सर्व सदस्य व अधिकाऱ्यांना विश्वासात घेऊन नगरविकासावर अधिक भर देण्यात येईल. बैलहोंगल नगरपालिकेला स्वच्छतेत जिल्ह्यात प्रथम व राज्यात द्वितीय क्रमांक मिळवून दिलेल्या जनतेचे तसेच ज्यांनी मला बिनविरोध निवडून आणण्यासाठी परिश्रम घेतले त्या सर्वांचे त्यांनी आभार मानले.

नूतन उपाध्यक्ष बुड्डेसाब शिरसंगी यांनीही शहराच्या विकासासाठी आमदार व सर्व सदस्यांना विश्वासात घेण्याचे आश्वासन दिले.