प्रत्येक खेळाडूने क्रीडास्पर्धांमध्ये खिलाडूवृत्तीने सहभागी होऊन पराभव व विजय समानतेने स्वीकारावा, असे आवाहन जिल्हाधिकारी नितेश पाटील यांनी केले.

बेळगाव जिल्हा स्टेडियमवर शुक्रवारी आयोजित राज्य शासकीय कर्मचाऱ्यांच्या जिल्हास्तरीय क्रीडा व सांस्कृतिक स्पर्धेचे उद्घाटन जिल्हाधिकारी नितेश पाटील यांच्या हस्ते करण्यात आले. एसपी डॉ. भीमाशंकर गुळेद यांनी क्रीडा ध्वजारोहण केले. जिल्हा पंचायत सीईओ राहुल शिंदे यांनी क्रीडा मशाल प्रज्वलित केली. त्यानंतर मान्यवरांच्या हस्ते आकाशात तिरंगी फुगे सोडून वार्षिक क्रीडास्पर्धांचे उदघाटन करण्यात आले.

जिल्हा प्रशासन, जिल्हा पंचायत, युवा सक्षमीकरण व क्रीडा विभाग, राज्य सरकारी कर्मचारी संघ जिल्हा शाखेच्या वतीने आयोजित क्रीडा स्पर्धांत सरकारी कर्मचाऱ्यांनी विविध क्रीडा प्रकारात भाग घेऊन जल्लोष केला.  जिल्हाधिकारी नितेश पाटील पुढे म्हणाले की, दोन दिवसीय शासकीय कर्मचारी क्रीडा स्पर्धेचे आयोजन करण्यात आले असून प्रत्येक खेळाडूने खिलाडूवृत्तीने सहभागी होऊन पराभव व विजय समानतेने स्वीकारावा. या व्यासपीठामुळे आम्हाला आमची प्रतिभा दाखवण्याची मुभा मिळाली आहे. आपण निरोगी राहिलो तर आपण अधिकाधिक लोकांची सेवा करू शकू, आयुष्यात कोणी कितीही वरचेवर आले आणि जगात नाव कमावले तरी ते गुरूमुळेच शक्य होते, असे ते म्हणाले.

एसपी डॉ. भीमाशंकर गुळेद म्हणाले की, जेव्हा आपण शारीरिकदृष्ट्या विशेषतः खेळातून तंदुरुस्त असतो, तेव्हा आपण मानसिकदृष्ट्याही तंदुरुस्त असतो. कितीही दडपण आले तरी शांतपणे काम पार पाडू शकतो, असे ते म्हणाले.
प्रेमा कुलकर्णी, राहुल शिंदे, जिल्हा शासकीय कर्मचारी संघाचे अध्यक्ष बसवराज रायवगोळ, व्ही. एस. पाटील यांच्यासह अनेक मान्यवर उपस्थित होते.