प्यास फौंडेशनने पुनर्जीवित केलेला मच्छे तलाव समारंभपूर्वक लघु पाटबंधारे विभाग आणि गावातील नागरिकांच्या ताब्यात दिला.

एकेपी फेरोकास्ट्सने सीएसआर योगदानातून प्यास फौंडेशनच्या सहयोगाने 2021 मध्ये मच्छे तलावाचे पुनरुज्जीवन केले. गावातील भूगर्भातील पाण्याचा मोठ्या प्रमाणावर ऱ्हास होत असल्याने तलावाचे पुनरुज्जीवन करण्याची विनंती मच्छे ग्रामस्थांनी फौंडेशनकडे केली होती. फौंडेशनने तत्काळ राम भंडारी, पराग भंडारी आणि एकेपी फेरोकास्ट समूहाचे गौतम भंडारी यांच्या मदतीने प्रकल्प ताब्यात घेतला ज्यांनी मदत करण्यास तत्परतेने सहमती दर्शविली.

सुमारे चार एकर क्षेत्रफळ असलेला तलाव जास्तीत जास्त वीस फुटांपर्यंत खोदण्यात आला आणि सर्व गाळ काढण्यात आला. किनारे संकुचित करण्यात आले आणि सुमारे 17 लाखांच्या सीएसआर निधीतून हा प्रकल्प पूर्ण झाला. आमदार अभय पाटील यांच्या मार्गदर्शनाखाली लघु पाटबंधारे विभागाने प्रकल्प पूर्ण करण्यासाठी रिटेनिंग वॉल, रिझर्वियर आणि रॅम्प बांधले. हा प्रकल्प आता गावासाठी वरदान ठरला आहे. कारण आजूबाजूच्या भागात कमी पाऊस असूनही विहिरी कोरड्या पडूनही या हंगामात शेतकऱ्यांनी पहिल्यांदाच भाजीपाला पिकवला आहे.

24 फेब्रुवारी रोजी तलावाच्या बाजूला झालेल्या कार्यक्रमात हा तलाव लघु पाटबंधारे विभागाकडे सुपूर्द करण्यात आला. एकेपी फेरोकास्टचे अध्यक्ष व व्यवस्थापकीय संचालक राम भंडारी यांच्या हस्ते लघु पाटबंधारे विभागाचे सहाय्यक कार्यकारी अभियंता एस माळगी यांच्याकडे सुपूर्द करण्यात आला.

या कार्यक्रमात बोलताना डॉ. माधव प्रभू यांनी एकेपी फेरोकास्टच्या पाठिंब्याबद्दल आणि प्यास फौंडेशनला तलाव पूनर्जीवीत करण्याची संधी दिल्याबद्दल ग्रामस्थांचे आभार मानून याची पार्श्वभूमी कथन केली.  श्री.राम भंडारे यांनी केलेल्या कामाबद्दल समाधान व्यक्त करत आगामी काळात गावाला अधिक सहकार्य करण्याचे आश्वासन दिले. अभियंता माळगी यांनी विविध तलावांचे पुनरुज्जीवन करण्याच्या फौंडेशनच्या प्रयत्नांची प्रशंसा केली. या कार्यक्रमाला प्यास फाऊंडेशनचे सदस्य, एकेपी फेरोकास्टचे कर्मचारी आणि ग्रामस्थ उपस्थित होते. कार्यक्रमाचे सूत्रसंचालन अवधूत सामंत यांनी केले.