धारवाड तालुक्यातील विविध गावातील शेतकऱ्यांनी धारवाड तहसीलदार दोड्डाप्पा हुगार यांना कार्यालयात कोंडून ठेवल्याची घटना घडली.

धारवाड तालुक्यातील सत्तूर, सुतगट्टी, इटिगट्टी, रायपूर, नवलूर, गमनगट्टी या गावातील शेतकऱ्यांनी तहसीलदार कार्यालयाला घेराव घालून तहसीलदारांना कार्यालयात कोंडून कुलूप ठोकून आंदोलन केले.

या गावांतील शेतकऱ्यांच्या शेतात तडसीनकोप्प गावातील गुरे चरत असून, पिके उध्वस्त करत आहेत. याबाबत तहसीलदार, जिल्हाधिकाऱ्यांना अनेकदा आवाहन करूनही तडसीनकोप्पमधील रहिवाशांवर कोणतीही कारवाई केलेली नाही. दररोज गुरे शेतात घुसतात आणि शेतकऱ्यांनी उगवलेले थोडेसे पीक नष्ट करतात.

शेतकऱ्यांच्या रक्षणासाठी जिल्हा प्रशासन पुढे येत नसल्याचा संताप शेतकऱ्यांनी व्यक्त करत तहसीलदार कार्यालयाला घेराव घालून टाळे ठोकले. तसेच, खराब झालेले पीक कार्यालयात आणून निषेध केला.