बेळगाव महानगरात नाविन्याचा हव्यास असलेल्या आमदार अभय पाटील यांना आता बेळगावच्या सौंदर्यात भर घालणाऱ्या आणि शेजारील राज्यातील पर्यटकांना आकर्षित करणाऱ्या केबल कार प्रकल्पाच्या अंमलबजावणीसाठी केंद्राकडून परवानगी मिळवण्यात यश आले आहे.

आ. अभय पाटील यांनी आज केंद्रीय मंत्री नितीन गडकरी यांची नवी दिल्ली येथे भेट घेऊन, बेळगाव दक्षिण मतदारसंघातील येळ्ळूर गावापासून राजहंसगडापर्यंत केबल कार बसविण्याच्या ६० कोटी रुपयांच्या प्रकल्पाला मंजुरी देण्याची विनंती केली. त्याला केंद्रीय मंत्र्यांनी तातडीने प्रतिसाद दिला.

डिसेंबरपर्यंत अहवाल प्राप्त करून आवश्यक निधी दिला जाईल, असे आश्वासन केंद्रीय मंत्री नितीन गडकरी यांनी दिले असून जानेवारीनंतर केबल कार प्रकल्पाचे काम सुरू केले जाईल, असे आमदार अभय पाटील यांनी सांगितले.

या प्रकल्पाच्या अंमलबजावणीमुळे येळ्ळूर हे बेळगाववासीयांसाठी सहलीचे ठिकाण बनेल, तसेच महाराष्ट्र व गोव्यातील शेजारील राज्यातील पर्यटकांना बेळगावकडे आकर्षित करण्यासाठी केबल कार हे प्रमुख आकर्षण ठरेल, त्यामुळे बेळगावची आर्थिक उलाढाल वाढेल असा विश्वास आमदार अभय पाटील यांनी व्यक्त केला.