राज्यात प्रतिष्ठेची असलेली हुबळी-धारवाड महापालिका ताब्यात घेण्यासाठी काँग्रेस आणि सत्तारूढ भाजपमध्ये जोरदार रस्सीखेच सुरूच आहे. पालिकेची सत्ता मिळवण्यासाठी काँग्रेसचे नेते डावपेच आखत आहेत, तर दुसरीकडे महापालिकेतील आपले सदस्य फुटू नयेत या भीतीने भाजपने त्यांना दांडेलीच्या रिसॉर्टवर ठेवले आहे.

हुबळी-धारवाड महानगरपालिकेची महापौर-उपमहापौरपद निवडणूक ही काँग्रेस आणि भाजपच्या नेत्यांसाठी प्रतिष्ठेची ठरली आहे. याबाबत भाजपने रिसॉर्टचे राजकारण केले, तर जिल्हा पालक मंत्री संतोष लाड यांच्या नेतृत्वाखाली काँग्रेसचे नेते बेंगळूरमध्ये रणनीती आखत आहेत. मंत्री संतोष लाड, माजी मुख्यमंत्री जगदीश शेट्टर, आमदार प्रसाद अब्बय्या, ग्रामीण अध्यक्ष अनिलकुमार पाटील यांच्या उपस्थितीत काँग्रेसची
बेंगळुर येथे बैठक झाली. काहीही करून पालिका ताब्यात घेण्यासाठी काँग्रेस सज्ज झाली आहे. लाड यांच्या नेतृत्वाखाली झालेल्या बैठकीत महापालिकेची सत्ता काबीज करण्याची योजना आखली आहे

तरीही हुबळी-धारवाड महानगरपालिकेत भाजप सदस्यांचे रिसॉर्टचे राजकारण सुरूच आहे. माजी मुख्यमंत्री जगदीश शेट्टर आपल्या गटाला सुरुंग लावतील याची भीती भाजपला आहे. त्यामुळे त्यांनी आपल्या सदस्यांना रिसॉर्टमध्ये मुक्कामाला पाठवले आहे. ऑपरेशन हातच्या भीतीने भाजप नगरसेवक दांडेली रिसॉर्टमध्ये मुक्कामास आहेत. माजी मुख्यमंत्री जगदीश शेट्टर यांच्या नेतृत्वाखालील हँड फोर्सने भाजप सदस्यांना फोडण्याची रणनीती आखली आहे. येत्या 20 तारखेला महापालिकेच्या महापौर आणि उपमहापौरपदाची निवडणूक होत असून, काँग्रेसच्या नेत्यांनी महापालिकेच्या प्रत्येक सदस्याला 50 ते 75 लाखांची ऑफर दिल्याचे बोलले जात आहे. काँग्रेसच्या ऑफरमुळे भाजप नेते घाबरले आहेत. दांडेली रिसॉर्टवर आता महापौर निवडणुकीचा लेखाजोखा मांडण्यात येत आहे.

हुबळी-धारवाड महानगरपालिकेत 39 भाजप, 33 काँग्रेस, 6 अपक्ष, एआयएमआयएम 3 आणि जेडीएस 1 जागा असे संख्याबळ आहे. महापौर आणि उपमहापौर निवडीसाठी 42चा जादुई आकडा आवश्यक आहे. या जादूसाठी काँग्रेसने भाजप सदस्यांना आमिष दाखवल्याचे बोलले जातेय. भाजपने सलग दोन दशके महापालिकेवर वर्चस्व राखले आहे. त्यामुळे राज्यात सत्तेत असलेला काँग्रेस पक्ष ते वर्चस्व मोडून टाकण्याच्या तयारीत आहे. त्यासाठी भाजपच्या नगरसेवकांना गळाला लावण्याचे प्रयत्न सुरु केले आहेत. तर दुसरीकडे पालिकेचे सुखानी आपल्या हाती कायम ठेवण्यासाठी भाजप रिसॉर्टमध्ये बसून रणनीती आखत आहे.