चिक्कोडी तालुक्यातील खडकलाट गावातील निप्पाणी-चिक्कोडी रस्त्यावरील लक्ष्मी मंदिर वळणावर भरधाव कारने दुचाकीला धडक दिल्याने राजस्थानमधील एका मजुराचा मृत्यू झाला. त्याच्या मागे बसलेला त्याचा मित्र गंभीर जखमी झाला.

राजकुमार बलराम वर्मा (२८, रा. बालनपूर, राजस्थान) असे मृत मजुराचे नाव आहे. विशाल प्रकाश बाटे हे या अपघातात गंभीर जखमी झाले आहेत. मंगळवारी रात्री बाराच्या सुमारास हा अपघात झाला. कारच्या धडकेने दुचाकीचा चक्काचूर झाला. याप्रकरणी खडकलाट पोलिस ठाण्यात गुन्हा दाखल करण्यात आला आहे.
राजकुमार आणि विशाल हे गेल्या अनेक वर्षांपासून चिक्कोडी येथे फरशी फिटिंगचे काम करत होते. दोघेही दुचाकीवरून चिक्कोडीला येत असत. मंगळवारी रात्री ते चिक्कोडीला दुचाकीवरून येताना खडकलाट गावच्या लक्ष्मी मंदिर वळणावर खडकलाटकडे जाणाऱ्या कारने समोरून येणाऱ्या दुचाकीला धडक दिल्याने राजकुमार व विशाल हे दोघे खाली पडले आणि दोघेही गंभीर जखमी झाले. त्यांना तातडीने कोल्हापुरातील शासकीय रुग्णालयात दाखल करण्यात आले. मात्र उपचार निष्फळ ठरल्याने राजकुमार यांचा मृत्यू झाला. बाटे यांच्यावर उपचार सुरू आहेत.
अपघाताची माहिती मिळताच पोलीस उपनिरीक्षक सुमलता असांगी, कॉन्स्टेबल यांनी परिसराची व्यापक पाहणी केली. राजकुमारचा मित्र पापापुरम फित्तरमल बलाई याने कार चालकाविरुद्ध तक्रार दाखल केली आहे.