अथणी मतदारसंघाच्या विकासासाठी हजारो कोटींचा निधी आणणारे आमदार महेश कुमठळ्ळी यांना साथ द्यावी, असे आवाहन गोकाकचे आमदार रमेश जारकीहोळी यांनी अथणीच्या जनतेला केले. अथणी येथे भाजप विजयसंकल्प यात्रेअंतर्गत आयोजित जाहीर सभेत ते बोलत होते.

आ. महेश कुमठळ्ळी यांनी मतदारसंघाचा सर्वांगीण विकास करण्याचे ध्येय ठेवले आहे. कोटलगीच्या अम्माजेश्वरी उपसा जलसिंचन प्रकल्पाला यापूर्वीच मंजुरी देण्यात आली आहे. येत्या काही दिवसांत या प्रकल्पाची पायाभरणी मुख्यमंत्री बसवराज बोम्मई यांच्या हस्ते होणार आहे असे त्यांनी सांगितले.

माजी उपमुख्यमंत्री लक्ष्मण सवदी म्हणाले की, मुख्यमंत्री बसवराज बोम्मई यांच्या नेतृत्वाखालील भाजप सरकारने राज्यात विकास आणि लोकाभिमुख कार्यक्रम राबवून राज्याला प्रगतीच्या वाटेवर नेले आहे. केंद्र आणि राज्य सरकारचे काम या यात्रेच्या माध्यमातून जनतेपर्यंत पोहोचवण्याचा उद्देश आहे.

अथणीचे आमदार महेश कुमठळ्ळी म्हणाले की, माजी मंत्री, गोकाकचे आमदार रमेश जारकीहोळी यांनी पुढील निवडणुकीत मी इतर कोणत्याही हेतूने नव्हे तर माझ्यावरील प्रेमापोटी उमेदवार असल्याची घोषणा केली आहे. रमेश जारकीहोळी यांच्या प्रयत्नांचे फलित म्हणून अम्माजेश्वरी पाटबंधारे प्रकल्प मंजूर झाल्याचे त्यांनी सांगितले. माजी डीसीएम लक्ष्मण सवदी आणि मी मिळून अथणीच्या विकासासाठी हजारो कोटींचा निधी आणला असून पुढील विधानसभा निवडणुकीत भाजपला पुन्हा साथ द्यावी, असे आवाहन त्यांनी केले.

सार्वजनिक बांधकाम मंत्री सी.सी.पाटील म्हणाले की, मुख्यमंत्री बोम्मई यांच्या नेतृत्वाखालील भाजप सरकारने शेतकरी व विणकर यांच्या मुलांच्या शिक्षणासाठी शेतकरी विद्यानिधीसह अनेक योजना राबविल्या आहेत. राज्यात भाजपची लाट असून आगामी निवडणुकीत भाजप 140 हून अधिक जागा जिंकणार असून राज्यात पुन्हा एकदा भाजपचे सरकार स्थापन होणार असल्याचे त्यांनी सांगितले.

शहरातील शिवाजी सर्कल येथे भाजपच्या संकल्प यात्रेचे कार्यकर्ते, नेते, पदाधिकाऱ्यांनी स्वागत केले. विजय संकल्प यात्रा शिवाजी सर्कल ते बसवेश्वर सर्कल, शिवयोगी सर्कल, डॉ. आंबेडकर सर्कल ते मुख्य बाजारपेठ मार्गे श्री सिद्धेश्वर आगासी मार्गे निघून वीर संगोळ्ळी रायण्णा सर्कल येथे सांगता झाली.

यावेळी माजी विधानपरिषद सदस्य अरुण शहापूर, अथणी भाजप मंडळचे अध्यक्ष डॉ. रवी संक, डॉ.उमेशराव बांदोडकर, डॉ. प्रकाश कुमठळ्ळी, डॉ. अनिल सौदागर, निंगाप्पा नंदेश्वर, मल्लाप्पा हंचीनाळ, अशोक दानगौडर, मुकुंद कुलकर्णी, अनिल बजंत्री, मलकू आंदानी, रमेश गौडापाटील आदींची उपस्थिती होती.
राकेश मैगुर, आपली मराठी, अथणी.