बेळगावात आरटीओ अधिकाऱ्यांनी क्यूआर कोडची सक्ती करत अचानक वाहन पासिंग बंद केल्याच्या निषेधार्थ कर्नाटक रक्षण वेदिकेच्या शिवरामगौडा गटाने आरटीओ कार्यालयासमोर निदर्शने करत आंदोलन छेडले.

गुरुवारी लॉरी चालक आणि कर्नाटक डिफेन्स फोरम शिवरामेगौडा यांनी आंदोलन करून आरटीओ अधिकाऱ्यांनी पैसे घेऊन पासिंग केल्याचा आरोप करून संताप व्यक्त केला. आरटीओचे अधिकारी वाहनांवर रेट्रो रेडियम घालून क्यूआर कोड लावण्याची सक्ती करत आहेत. क्यूआर कोडची सक्ती रद्द झाल्याचे परिपत्रक निघाले असूनही अशी सक्ती करण्यात येत आहे. याच्या निषेधार्थ बेळगाव लॉरी ओनर्स असोसिएशन आणि करवे शिवरामगौडा गटातर्फे आरटीओ कार्यालयासमोर ठिय्या मांडून आंदोलन करण्यात आले. यावेळी आरटीओ अधिकाऱ्यांच्या विरोधात घोषणाबाजी करण्यात आली.

यासंदर्भात बोलताना बेळगाव लॉरी ओनर्स असोसिएशन आणि करवे नेत्यांनी सांगितले की, मालवाहू वाहने, प्रवासी रिक्षांच्या पासिंगसाठी क्यू आर कोडची सक्ती करू नये असे परिपत्रक सरकारने जारी केले आहे. रेट्रो रिफ्लेक्टर्समुळे रात्रीच्यावेळी वाहन अपघात टाळता येतात. त्यामुळे आमचा त्याला विरोध नाही. परंतु खासगी कंत्राट देऊन ७० ते १०० रुपये किमतीचे क्यू आर कोड १५० रुपये देऊन लावण्याची सक्ती करण्यात येत आहे. याला आमचा विरोध आहे. पैसे घेऊन ते वाहन न पाहता पासिंग करत आहेत. पैसे न देणाऱ्या वाहनांचे पासिंग केले जात नाही. बेळगाव आरटीओ अधिकारी सरकारी नियम पाळत नाहीत. त्यामुळे वाहनधारकांना आंदोलन करावे लागत असल्याची परिस्थिती निर्माण झाली आहे. अशा अधिकाऱ्यांवर कारवाई करावी, अशी मागणी त्यांनी केली.

या आंदोलनात लॉरी ओनर्स असोसिएशनचे सदस्य, रिक्षाचालक, करवे कार्यकर्ते मोठ्या संख्येने सहभागी झाले होते.