बेळगाव जिल्ह्यातील रामदुर्ग तालुक्यातील कडलीकोप्प गावाजवळ भरधाव क्रुझर वाहन आणि दोन दुचाकी यांच्यात समोरासमोर झालेल्या धडकेत दोन तरुणांचा जागीच मृत्यू झाला तर अन्य दोघे गंभीर जखमी झाले.
या घटनेत, रामदुर्ग शहरातील भाग्यनगरचा रहिवासी 25 वर्षीय महानिंग नांजप्पा अचमट्टी आणि मड्डीगल्ली येथील 26 वर्षीय रफिक चलवादी यांचा दुर्दैवी मृत्यू झाला.

या अपघातात दोघेजण जखमी झाले आहेत. त्यापैकी उन्नीस मुहम्मद पटेल शहरातील आश्रय कॉलनी येथील रहिवासी असून, त्यांच्यावर बागलकोट रुग्णालयात उपचार सुरू आहेत. तर भाग्यनगर येथील रहिवासी असलेल्या मारुती बंडीवड्डर यांच्यावर स्थानिक शासकीय रुग्णालयात उपचार सुरू आहेत.

सौंदत्ती तालुक्यातील शिरसंगी गावातून दोन दुचाकींवरील चार जण रामदुर्गाकडे येत असताना शिरसंगीकडे जाणार्‍या क्रुझर व या दोन दुचाकींमध्ये धडक होऊन भीषण अपघात झाला. या अपघातात दोन तरुणांचा जागीच मृत्यू झाला.
या घटनेबाबत स्थानिक पोलिस ठाण्यात गुन्हा दाखल करण्यात आला असून पोलिसांनी तपास सुरू केला आहे.