चालता बोलता देव म्हणून प्रसिद्ध असलेले विजापूरच्या ज्ञानयोगाश्रमाचे श्री सिद्धेश्वर स्वामीजींचे निधन झाले आहे . त्यांच्या अंतिम दर्शनासाठी भाविकांचा महासागर ओसंडून वाहत आहे.

विजापूर शहरातील ज्ञानयोगाश्रमात सोमवारी सायंकाळी ६ .०५ वाजता या जगाचा निरोप घेतला . त्यानंतर त्यांचे पार्थिव खुल्या वाहनातून विजापूर येथील सैनिक शाळेत हलविण्यात आले. श्रींचे पार्थिव लिंगायत प्रथेनुसार पुष्पहारांनी सजवलेल्या मोकळ्या वाहनात ठेवण्यात आले आणि पूर्ण शासकीय सन्मानाने सैनिक शाळेच्या आवारात आणण्यात आले. सैनिक शाळेत पूर्वी तयार करण्यात आलेल्या विशाल व्यासपीठावर श्रींचे पार्थिव दर्शनासाठी ठेवण्यात आले आहे. श्रींच्या समोर राष्ट्रध्वज लावून शासनाकडून आदरांजली वाहण्यात आली आहे. जनतेला रांगेत उभे राहून श्रींचे अंतिम दर्शन घेता यावे यासाठी जिल्हा प्रशासनाने सर्व व्यवस्था केली आहे.

गर्दीवर नियंत्रण ठेवण्यासाठी ठिकठिकाणी बॅरिकेड्स लावण्यात आले आहेत. श्रींचे पार्थिव ठेवलेल्या व्यासपीठासमोर विविध श्रींना बसण्यासाठी खुर्च्या ठेवण्यात आल्या आहेत. इतकेच नव्हे तर मान्यवरांच्या बसण्याची व्यवस्थाही स्वतंत्रपणे करण्यात आली आहे. विजापूर शहरातील वाहतूक कोंडी कमी करण्यासाठी पोलिसांनी शहरातील चारही दिशांना महत्त्वाच्या ठिकाणी वाहनांच्या पार्किंगची व्यवस्था केली आहे. केवळ विजापूरचा नाही तर बेळगाव विभागातील बेळगाव , धारवाड, हावेरी, गदग, बागलकोट जिल्ह्यांतील पोलीस आणि विजापूरमध्येच तैनात भारतीय राखीव पोलीस दलाला पाचारण करण्यात आले आहे. तीन एसपींना सुरक्षेची जबाबदारी देण्यात आली आहे.

अंत्यदर्शनासाठी येणाऱ्या जनतेसाठी आ . एम. बी. पाटील आणि बसनगौडा पाटील यत्नाळ यांनी सुमारे पाच ते सहा लाख लोकांसाठी जेवणाची व्यवस्था केली आहे. जिल्हा पेट्रोलियम असोसिएशनने शहरातील सर्व पेट्रोल स्टेशनवर श्रींच्या भक्तांसाठी प्रसादाची व्यवस्था केली आहे. तसेच विजापूरमधील विविध संस्थांकडूनही पायी जाणाऱ्या लोकांसाठी ठिकाणी अल्पोपाहार, पाणी आणि चहाची व्यवस्था करण्यात येत आहे. श्री सिद्धेश्वर स्वामीजींचे दर्शन घेताना भक्तांना अश्रू अनावर होत आहेत .