जोपर्यंत फसणारे आहेत, तोपर्यंत फसवणूक करणारे असतील. ऑनलाईन फसवणुकीची प्रकरणे सोशल नेटवर्किंगमुळे आजच्या काळात सामान्य झाली आहेत. फेसबुकवर तरुणीच्या ‘फ्रेंड रिक्वेस्ट’मुळे एक-दोन नव्हे तर चक्क लाखो रुपयांचा चुना एका युवकाला लागला असून, आता त्याला पोलिस ठाणे गाठावे लागले आहे. याबाबत पेश आहे हा स्पेशल रिपोर्ट.

होय, ही घटना घडली आहे, विजापूर जिल्ह्यातील सिंदगी तालुक्यातील बगलूर गावात. येथील रहिवासी असलेल्या परमेश्वर नानगौडा हिप्परगी नावाच्या युवकाला ‘फ्रेंड रिक्वेस्ट’मुळे एक-दोन नव्हे तर चक्क लाखो रुपयांचा चुना लावल्याची घटना घडली आहे. तो तेलंगणा राज्यातील रंगारेड्डी जिल्ह्यातील आदित्य नगर येथील आडिबट्टल गावात एका कंपनीत काम करतो. फेसबुक ‘फ्रेंड रिक्वेस्ट’मुळे त्याचे बरोबर 39,04,870 रुपयांचे नुकसान झाले आहे. हे प्रकरण याच 2022 वर्षातले आहे. जून 29 रोजी सकाळी 9.10 वाजता परमेश्वर सिंदगी येथे असताना मंजुळा के.आर. नामक फेसबुक आयडीवरून युवतीची फ्रेंड रिक्वेस्ट येते. याची पुष्टी झाल्यावर मेसेंजरमध्ये ‘हाय’ असा संदेश येतो. तेव्हापासून परमेश्वर आणि मंजुळा रोज एकमेकांना मेसेज करत आलेत. 14 ऑक्टोबर 2022 रोजी मंजुळाने आईची तब्येत बरी नाही त्यासाठी फोन पे वर 700 रुपये देण्यासाठी मेसेज केला. यावर विश्वास ठेवून परमेश्वरने 700 रुपयांचे फोन पेमेंट केले. नंतर तिने 2000 रु. मागितले, ते पैसेही त्याने दिले. दुसऱ्या दिवशी आई वारली, 2000 रु.ची गरज आहे असं सांगितल्याने त्याने फोन पे वर पैसे भरले. मग तिथीच्या कामासाठी म्हणून 5000 रु.ची गरज असल्याचा मेसेज केल्याने परमेश्वरने पुन्हा पैसे दिले.

काही दिवसांनी मंजुळाने परमेश्वरला फोन केला आणि सांगितले की ती आयएएसची परीक्षा उत्तीर्ण झाली आहे आणि तिला लवकरच जिल्हाधिकारी पद मिळणार आहे. सध्या हासनमध्ये माझी काळजी घेणारे कोणी नाही. त्यासाठी बेंगळूरला जावे लागेल. तिथे खर्च करायला पैसे नाहीत. आर्थिक मदत केल्यास तुझ्याशी लग्न करेन असे तिने सांगितले. त्यावर विश्वास ठेवून परमेश्वराने एकाच दिवशी दोन हप्त्यांमध्ये पाच हजार रुपये पाठवले. यामुळे ऑफर आणखी वाढली. काही दिवसांनी मंजुळाने आणखी सलगी वाढवत त्याला विश्वासात घेतले. तिच्यावर विश्वास ठेवून परमेश्वरने त्याच्या बँक खात्यातून एकूण 40,86,800 रुपये मंजुळाच्या खात्यात टप्प्याटप्प्याने ट्रान्सफर केले. तसेच, फोन पेसह एकूण रक्कम 41,26,800 रुपये वर्ग केली आहे. त्याने मंजुळाला दिली. त्यानंतर आपल्या खर्चासाठी पैसे नसल्याचे सांगून त्याने मंजुळाकडून 2,21,930 रुपये परत मिळवले. मंजुळा वारंवार पैशांची मागणी करत असल्याने आपली फसवणूक होत असल्याचा संशय आल्याने त्याने 15 नोव्हेंबर रोजी विजापूर सीईएन पोलीस ठाण्यात तिच्याविरुद्ध तक्रार दाखल केली. याबाबत प्रसारमाध्यमांना माहिती देताना पोलीस अधीक्षक एच. डी. आनंदकुमार म्हणाले, या प्रकरणाच्या संदर्भात विशेष तपास पथक यापूर्वीच तयार करण्यात आले आहे. लवकरच या प्रकरणाचा छडा लावण्यात येईल. तक्रारदाराला न्याय देण्यासाठी प्रामाणितक प्रयत्न केले जातील, असे त्यांनी सांगितले.

एकंदर, एका सुशिक्षित तरुणाने ओळख पाळख नसलेल्या तरुणीच्या जाळ्यात अडकून मोठ्या प्रमाणात पैसे गमावले आहेत, आता आरोपीला अटक करून पैसे वसूल करण्यासाठी विजापूर पोलिसांनी कंबर कसली आहे.