गुन्हेगारांचा शोध घेणे त्याचप्रमाणे कायदा सुव्यस्था अबाधित राखण्यासाठी रात्रंदिवस तणावा खाली काम करणाऱ्या पोलिसांनी आपला सर्व ताणतणाव बाजूला सारून क्रीडा स्पर्धांमध्ये उत्साहात भाग घेतला .

होय , बेळगाव शहरातील जिल्हा पोलीस कवायत मैदानावर पोलीस आयुक्तालय , शहर व जिल्हा पोलीस विभागाच्या वतीने दोन दिवसीय वार्षिक पोलीस क्रीडा स्पर्धेचे आयोजन करण्यात आले होते . जेष्ठ स्वातंत्र्य सैनिक राजेंद्र कलघटगी , यांच्या हस्ते क्रीडा मशाल प्रज्वलित करून , आणि रंगबिरंगी फुगे हवेत सोडून या क्रीडा स्पर्धांचा शुभारंभ करण्यात आला . यावेळी पोलीस दलाच्या कर्मचाऱ्यांनी केलेल्या आकर्षक पथसंचलनाने सर्वांचे लक्ष वेधून घेतले.

क्रीडा स्पर्धांचे उदघाटन करून बोलताना जेष्ठ स्वातंत्र्यसैनिक राजेंद्र कलघटगी म्हणाले कि ,सीमेवर लढताना अनेकांना वीरमरण येते . पोलीस देशाचे रक्षण करतात . २४ तास ते कर्तव्य बजावत असतात . आपल्या जीवनात अनेक अडीअडचणींना तोंड देत ते आपले कर्तव्य पार पाडत असतात . वाहतूक समस्या देखील योग्यरीत्या सोडवतात . कायदा आणि सुव्यवस्था राखण्यासह प्रत्येक गोष्टीत ते आघाडीवर असतात . आपल्या कुटुंबाची पर्वा न करता समाजासाठी काम करणाऱ्या पोलिसांचा अभिमान आहे . असे ते म्हणाले . स्वातंत्र्य लढ्यात इंग्रजांविरुद्ध लढत असताना पोलिसांनी आम्हाला अटक करून न्यायालयात हजर केले . शिक्षा भोगूनदेखील आपण इंग्रजांविरुद्ध लढलो . आणि स्वातंत्र्य मिळवण्यात यशस्वी झालो अशी आठवण त्यांनी यावेळी सांगितली . आपली आरोग्याचे रहस्य सांगताना ते म्हणाले कि , मी माझे जेवण वेळच्या वेळी करतो त्याचप्रमाणे रोज चालण्याचा व्यायाम करतो. कुठल्याही परिस्थितीत बाहेरचे पदार्थ खात नाही.

यावेळी शहर पोलीस आयुक्त डॉ . एम बी बोरलिंगय्या म्हणाले कि , पोलीस दलासाठी क्रीडा खूप महत्वाच्या आहेत. फिटनेस खूप महत्वाचा आहे . स्वास्थपूर्ण तसेच एकसंध राहण्यासाठी खेळात सहभाग घेणे आवश्यक आहे . त्याचप्रमाणे शतायुषी जेष्ठ स्वातंत्र्य सैनिक राजेंद्र कलघटगी यांनी उपस्थित राहून पोलीस क्रीडा स्पर्धांचे उदघाटन केले हि प्रशंसेची बाब आहे . त्यांच्याकडे पाहून आम्हाला प्रेरणा मिळते.

क्रीडा स्पर्धांच्या उदघाटनावेळी , जिल्हा पोलीस अधीक्षक डॉ . संजीव पाटील , शहर पोलीस आयुक्त डॉ . एम बी बोरलिंगय्या , अतिरिक्त पोलीस अधीक्षक महानिंग नंदगावी , डीसीपी स्नेहा पी व्ही , रवींद्र गडादी ,आदी उपस्थित होते .

शनिवारी संध्याकाळी ४ वाजता या क्रीडा स्पर्धांचा समारोप होणार आहे . या कार्यक्रमासाठी एम एल आर आय सी चे ब्रिगेडीयर जॉयदीप मुखर्जी उपस्थित राहणार आहेत . यावेळी विजेत्या संघाना तसेच खेळाडूंना पारितोषिके वितरित केली जाणार आहेत .