जागतिक धर्म परिषदेत सर्वप्रथम हिंदू धर्माची पताका डौलाने फडकाविणाऱ्या स्वामी विवेकानंदांच्या बेळगाव भेटीला १३० वर्षे पूर्ण झाली आहेत. यानिमित्त येत्या रविवार दि. १६ ऑक्टोबर रोजी स्वामी विवेकानंद मार्ग (रिसालदार गल्ली) येथील स्वामी विवेकानंद स्मारक येथे दिवसभर विविध कार्यक्रमांचे आयोजन केले आहे.

भारत भ्रमण करताना स्वामी विवेकानंदांनी १६ ते २७ ऑक्टोबर १८९२ कालावधीत बेळगावात वास्तव्य केले होते. त्यांच्या भेटीला १३० वर्षे पूर्ण झाली आहेत. त्या निमित्ताने रविवार दि.१६ ऑक्टोबर रोजी स्वामीजींनी वास्तव्य केलेल्या स्वामी विवेकानंद मार्ग (रिसालदार गल्ली) येथील स्वामी विवेकानंद स्मारक येथे दिवसभर विविध कार्यक्रमांचे आयोजन केले आहे. सकाळी सहा ते सायंकाळी सात या वेळेत विवेकानंद स्मारकाला भेट देऊन स्वामीजींचा आशीर्वाद व प्रसाद घ्यावा असे आवाहन रामकृष्ण मिशन आश्रमाचे सचिव स्वामी आत्मप्राणानंद यांनी केले.

विवेकानंद स्मारकात स्वामीजींनी बेळगाव वास्तव्यात वापरलेला खाट, आरसा आणि लाठी देखील जतन करून ठेवण्यात आली आहे.स्वामीजींच्या जीवनावर आधारित चित्र प्रदर्शन देखील भेटीच्या वेळी भक्तांना पाहता येईल. रविवारी सायंकाळी पावणे सहा ते सात या वेळेत कन्नड भजन आणि मराठी प्रवचनाचा कार्यक्रम होणार आहे. सायंकाळी सात ते रात्री साडे आठ या वेळेत ‘योध्दा सन्यासी-स्वामी विवेकानंद’ हा एकपात्री प्रयोग पुण्याचे राष्ट्रीय कलाकार दामोदर रामदासी सादर करणार आहेत. जनतेने या कार्यक्रमाला उपस्थित राहावे असे आवाहन रामकृष्ण मिशन आश्रमाचे सचिव स्वामी आत्मप्राणानंद यांनी केले आहे.