हुबळी येथील केएलई टेक्नॉलॉजिकल युनिव्हर्सिटीशी संलग्न बेळगावच्या केएलई डॉ. एम. एस. शेषगिरी कॉलेज ऑफ इंजिनिअरिंग अँड टेक्नॉलॉजी यांच्यातर्फे कृषी व फळ प्रक्रिया उद्योगांवर आधारलेले ७५ प्रकल्पांच्या ‘प्रयोगवर्ष २०२२‘ प्रदर्शनाचे आज शानदार समारंभात उद्घाटन करण्यात आले.

‘प्रयोगवर्ष २०२२’ या प्रदर्शनात कृषी व फळ प्रक्रिया, घरगुती उपकरणे, वैद्यकीय उपकरणे, दैनंदिन जीवनात लागणाऱ्या वस्तूंशी संबंधित निवडणे, बाजूला करणे अशा साधनांच्या प्रकल्पांचा समावेश होता.प्रथम वर्षात शिकणाऱ्या ३०० विद्यार्थ्यांनी या प्रकल्पांमध्ये सहभाग घेतला. त्यांना ३० प्राध्यापकांचे मार्गदर्शन लाभले आहे. या प्रकल्पांच्या ‘प्रयोगवर्ष २०२२’ प्रदर्शनाचे शुक्रवारी उद्घाटन जिल्हाधिकारी डॉ. नितेश पाटील यांच्या हस्ते करण्यात आले.

यावेळी बोलताना नितेश पाटील म्हणाले, अभियांत्रिकी व्यवसायात बदलत्या गरजा पूर्ण करण्यासाठी संशोधन केले जात आहे. नवनवीन तंत्रज्ञान आत्मसात करून विद्यार्थ्यांची रोजगार क्षमता वाढविण्याचा पयत्न केला जात आहे. भारत हा वेगवान विकसित होणारा देश असून, देशाची अर्थव्यवस्था बदलण्यासाठी प्रयत्न केले जात आहेत. देशामध्ये नवीन तंत्रज्ञान विकसित करण्यामध्ये अभियांत्रिकी क्षेत्राचा मोठा वाटा असल्याचे त्यांनी सांगितले. हुबळी येथील केएलई टेक्नॉलॉजीकल युनिव्हर्सिटीचे कुलगुरू डॉ. अशोक शेट्टर म्हणाले, आज नवीन शिकण्याचे तंत्र म्हणजे केवळ पाच तास वर्गात उपस्थित राहणे नाही तर प्रकल्प आधारीत शिक्षणाद्वारे कौशल्य आत्मसात करणे हे असल्याचे त्यांनी सांगितले.

प्राचार्य डॉ. बसवराज कटगेरी यांनी उपस्थितांचे स्वागत केले. यावेळी ऐश्वर्या कळसद, प्रा. सदानंद कुलकर्णी आदी उपस्थित होते.