हिरेबागेवाडी पोलिसांनी काल, बुधवारी मध्यरात्री धडक कारवाई करीत गोमांसाची वाहतूक करणाऱ्या दोघांच्या मुसक्या आवळल्या. यावेळी गोमांस आणि त्याची वाहतूक करणारी २ वाहने जप्त करण्यात आली. 

होय, गोहत्येला बंदी असूनही रोजरोस छुप्या मार्गाने गोहत्या करून गोमांसाची परराज्यात वाहतूक करण्यात येत असल्याच्या तक्रारी आहेत. या पार्श्वभूमीवर हिरेबागेवाडी पोलिसांनी बुधवारी मध्यरात्री धडक कारवाई करून गोमांसाची वाहतूक करणाऱ्या दोघांना बेड्या ठोकल्या. हलगीमर्डी क्रॉसवरून २ व्हॅनमधून गोमांसाची तस्करी करण्यात येत असल्याची निश्चित खबर मिळाल्यावरून पोलिसांनी सापळा रचून ही कारवाई केली.

हिरेबागेवाडी पोलीस ठाण्याचे सीपीआय विजयकुमार सिन्नूर यांच्या मार्गदर्शनाखाली पीएसआय शशिकुमार कोरले व पोलीस सहकाऱ्यांनी दोघा आरोपीना अटक केली. व्हॅनमधील गोमांसासह त्याच्या वाहतुकीसाठी वापरलेल्या दोन्ही व्हॅन जप्त करण्यात आल्या. हुसेन देसाई आणि आज्जप्पा कादरोळी, रा. मडगाव, गोवा अशी अटक केलेल्या आरोपींची नावे आहेत.