भरधाव इनोव्हा कारने रस्त्यात थांबलेल्या ट्रकला मागून जोराची धडक दिल्याने १२ वर्षीय बालिका जागीच ठार तर ५ जण गंभीर जखमी झाले. हा अपघात पुणे–बेंगळूर राष्ट्रीय महामार्गावर संकेश्वरजवळील सोलापूर क्रॉसवर आज पहाटे झाला.

 होय हुक्केरी तालुक्यातील संकेश्वरजवळील सोलापूर क्रॉसवर राष्ट्रीय महामार्ग क्र. ४ वर आज पहाटे इनोव्हा कारने  रस्त्यात थांबलेल्या ट्रकला मागून जोराची धडक दिली. त्यामुळे कारमधील १२ वर्षीय बालिका प्रिया मनोज पाटील ही जागीच ठार झाली तर कारमधील अन्य ५जण गंभीर जखमी झाले. अपघातग्रस्त कार हुबळीहून निपाणीकडे चालली होती असे सांगण्यात आले. संकेश्वर पोलीस ठाण्याचे उपनिरीक्षक गणपती कोगनोळी, पोलीस भीमाप्पा नागनुरे, कपरट्टी आदींनी भेट देऊन जखमींना इस्पितळात दाखल केले. अपघातग्रस्त वाहने रस्त्यातून हटवून वाहतूक मोकळी करून दिली. संकेश्वर पोलीस ठाण्यात अपघाताची नोंद करण्यात आली आहे.