टार्गेट करून अवघ्या चारच दिवसांत एकाच घरात दोनदा चोरी करून चोरटयांनी पोलीस यंत्रणेला आव्हान दिले आहे. ही घटना निपाणीतील शाहुनगरात उघडकीस आली आहे.

होय, बेळगाव जिल्ह्यातील निपाणी शहरातील शाहूनगर या उपनगरात एकाच घरात ४-५ दिवसांत दोनदा चोरी झाल्याचा धक्कादायक प्रकार उघडकीस आला आहे. गौरी-गणेश सणासाठी घरातील लोक परगावी गेल्याची संधी साधून चोरटयांनी या घरात घुसून १० हजार रुपयांचा ऐवज लांबवला होता. त्यानंतर ४-५ दिवसांतच घरातील लोक कोल्हापुरात शिकणाऱ्या मुलाला भेटण्यासाठी गेले असता, काल सायंकाळी ६.३० ते ७.३० या वीज पुरवठा बंद असण्याच्या काळात चोरटयांनी छतावरून घरात प्रवेश करून ३ तोळ्यांचे गंठण, अर्ध्या तोळ्याच्या २ अंगठ्या, दीड तोळ्यांची चेन असे सोन्याचे दागिने आणि देवघरातील पूजेचे चांदीचे साहित्य असा किंमती ऐवज लांबवला. घरमालक शशिकांत ईश्वर तोडकर काल सायंकाळी ८.३०च्या सुमारास घरी परत आले असता, घरात पुन्हा चोरी झाल्याचे दिसून आले. याबाबत त्यांनी तातडीने निपाणी शहर पोलीस ठाण्यात फ़िर्याद नोंदवली. निपाणी पोलीस अधिक तपास करत आहेत.