: बेळगावातील समर्थनगरात एका घरात स्वयंपाकाच्या गॅस सिलेंडरचा गळतीमुळे स्फोट झाल्याने कुटुंबातील तिघेजण गंभीर जखमी झाले. ही दुर्घटना शनिवारी सकाळी घडली. समर्थनगरातील तिसऱ्या क्रॉसवरील उळवप्पा शिवपुत्राप्पा हुलिकट्टी यांच्या घरात शनिवारी सकाळी गॅसगळतीमुळे  दुर्घटना घडली. सकाळी गॅसशेगडी सुरु करताना अचानक सिलेंडरचा स्फोट झाला. त्यात कुटुंबप्रमुख उळवप्पा शिवपुत्राप्पा हुलिकट्टी, त्यांची पत्नी बसव्वा आणि मुलगा नागराज हे तिघे गंभीर जखमी झाले. स्फोटाची भीषणता इतकी होती की, घरावरील पत्रे उडून गेले. त्याशिवाय स्फोटानंतर लागलेल्या आगीत घरातील स्टील कपाट, बेड व अन्य संसारोपयोगी वस्तू आगीत भस्मसात झाल्या. जखमींना उपचारासाठी बीम्स जिल्हा इस्पितळात दाखल करण्यात आले आहे. मार्केट पोलिसांनी घटनास्थळी भेट देऊन पंचनामा केला. गॅस गळतीमुळेच हा स्फोट झाल्याचा प्राथमिक अंदाज आहे. मार्केट पोलीस अधिक तपास करीत आहेत.